تجربة الدراسة: سنة ثالثة في كلية الطب
تجربة الدراسة: سنة ثالثة في كلية الطب
أهلًا بكم بعد عامين من الانقطاع عن الكتابة. كونكم تقرؤون هذه
التدوينة فهذا يعني تجاوزكم لمنتصف الطريق. مبارك لكم الوصول.
قبل البدء:
1.
لا يقصون
عليكم ويقولون سنة ثالثة هي عنق الزجاجة، لأننا كما يبدو لي محشورين في عنق
الزجاجة منذ بدايتنا. تجاوزنا ما مضى وقادرين على القادم بإذن الله
2.
في حال كنت
تبحث عن طبطبة من نوع "خلقت بلسمًا" أرجو ألّا تستمر بالقراءة. نتحدث
هنا عن واقع محضٍ بحلوهِ ومُرّه.
3.
كل ما يذكر
هنا هو رأي شخصي، ما يعني عدم إلزامك باتباعه.
بشكل عام: وش عندنا في سنة ثالثة؟ (الفقرة المفضلة
لمن لا يحبون الخوض في التفاصيل)
البلوك الأول (الأورام والحوادث والعظام): في
هذا البلوك راح تكون المواضيع عن جميع أنواع الأورام وطرق العلاج المتاحة لها
وبعدها بتمرون على بعض الأساسيات في تخصص العظام وشوية أمراض معروفة فيه.
البلوك الثاني (فقدان الوظيفة الحاد): في
هذا البلوك المحتوى كله عن إسعاف الإصابات بمختلف أنواعها وأسبابها، يعني بلوك
طوارئ مع شوي بهارات من تخصصات أخرى.
البلوك الثالث (دورة الحياة 1): هنا
دراستكم كلها راح تكون عن تخصص النساء والولادة وبعض المواضيع البسيطة المرتبطة
فيه من البلوغ والانجاب إلى أن توصلون لمقدمات بسيطة عن الأطفال (خصوصًا حديثي
الولادة والرضّع)
البلوك الرابع (دورة الحياة 2): هذا
البلوك مرتبط بشكل كبير بسابقه ف راح تكملون دراسة عن الأطفال بمختلف فئاتهم
العمرية بالإضافة إلى بعض مواضيع الشيخوخة.
المواد الاختيارية: كل طالب راح
يكون عنده حرية اختيار 3 مواد يدرسها بالتزامن مع أول ثلاث بلوكات في السنة. المواد
هذي راح تختارها من قائمة تجهزها لكم الكلية قبل بداية الدراسة. أما عن المادة
الرابعة واللي راح تكون بالتزامن مع البلوك الأخير فهذي بتكون (الطب الشرعي)
وبتسجلونها مع الدفعة كلها.
المنتور: هذي السنة راح يكون الشغل
مختلف شوي لأن من المفترض إنك مع نهاية سنة ثالثة تسلم مقترح بحثي. العمل بيكون
مقسم على 8 sessions في كل مرة تجتمعون مع المنتور بيعلمكم عن شيء
جديد ويقيم شغلكم في المهام السابقة.
الـPD: تسليم الاسايمنت بيكون قبل السشن، والنقاش بالسشن
بيكون إما على محتوى الاسايمنت أو موضوع مرتبط فيه
البروقرس: لا جديد في
الموضوع حتى الآن. اختبارين ومتطلبات النجاح بالمادة مشابهة لسنة ثانية.
الحين نتكلم بشوية تفاصيل عن البلوكات:
بلوك 3.1 (الأورام والحوادث
والعظام): وقياسًا على مبدأ (لا تحكم على الكتاب من عنوانه)، راح
تدرس أورام مع شوية عظام بس بدون حوادث..
الجميل في هذا البلوك إن محتواه منظم بشكل منطقي. يعني في البداية
راح تدرسون عن بداية تكون الأورام من الطفرات الجينية والجزيئات، وصولًا إلى أنواع
العلاج (الكيماوي، الاشعاعي، الجراحي، والتلطيفي). برضو راح تتكلمون شوي عن مواضيع
خفيفة مثل العناية بمرضى السرطان، أشياء بسيطة متعلقة بطب الألم، بالإضافة إلى
التغذية.
في النصف الثاني من البلوك راح تدخلون على أساسيات العظام وتكوينها
والعمليات الحيوية الطبيعية فيها، شوية أمراض متعلقة بالعظام، أورام العظام،
ومحاضرات عن تجبير الكسور والطب التأهيلي.
التوتر سشن: راح يكون
عبارة عن كيس وفيها مجموعة أسئلة. بعضكم بيكون مطلوب منه فقط إجابة السؤال
ومناقشته مع الأعضاء والباقي بيكون مطلوب منهم تقديم برزنتيشن كامل للإجابة
(التقسيم راح يكون موجود بالروستر لا تخافون من اللخبطة)
اللابات: دعم الحياة الأساسي للأطفال (PBLS)
كالعادة محاضرة بسيطة بعدها تقييم عملي ونظري. لابين باثولوجي الأول عن طرق تشخيص
الأورام وأنظمة الـstaging والثاني
راح يكون عن أورام الدم بتفاصيلهم . لاب اورثو بيكون موضوعه الأساسي تجبير الكسور.
الاختبارات: ميد وفاينل،
وعن خاطركم لو تبون تحسبون كويز الـPBLS تبعهم محد
بيقول لكم لا.
نصيحتي ورأيي الشخصي عن هذا البلوك:
o
المحتوى مب
سيء مع العلم بأني أكثر شخص بالعالم يبغض مواضيع الأورام والعظام. المذاكرة برضو
ممكن تكون بسيطة وسهلة بس هذا ما يعني انكم تستهينون فيه.
o
عن نفسي
كتاب العظام كان صديق سيء ما دامت صحبته أكثر من يومين لكن حاولوا تعطونه فرصة.
o
للأمانة
الشرح ما كان يعتمد عليه بشكل كبير ف طبيعي جدًّا تطلع من المحاضرة وفوق راسك
مليون استفهام. لذلك حاول تنقذ نفسك بنفسك عشان ما تغرق بالأخير.
بلوك 3.2 (فقدان الوظيفة الحاد): حاولوا تغضون
النظر عن سمعة البلوك السيئة لأنها شر لا بد منه وكلنا عارفين من وين مصدرها. المهم
إن جايكم أرهب بلوك في السنة 😌.
هالبلوك بتمر عليكم كل الحالات اللي تتطلب تدخل سريع، والمواضيع
كلها مقسمة على ثلاث محاور: الطوارئ، الجراحة، العناية الحرجة. بداية البلوك كل
الكلام راح يكون عن بروتوكول ATLS وطريقة تطبيقه على مختلف
الحالات. بعدها راح تاخذون أنواع الـshock
والتدخلات العلاجية بكل نوع. بالإضافة إلى شوية مواضيع عن النزيف وأمراض التجلط
وسيولة الدم، الحالات الطارئة المتعلقة بالربو. وبنفس الوقت بتاخذون بعض الطوارئ
الجراحية مثل تسلّخ الأبهر بأنواعه، الاندحاس القلبي، الذبحة الصدرية وغيرها من
المواضيع (لا تخافون من الأسماء لكن أتوقع جا الوقت اللي ضروري تتعلمون فيه الطب
بالعربي)
بعد الميد راح يكون التركيز على الحالات الطارئة المتعلقة بالجهاز
الهضمي مع شوية مواضيع عن العظام والكسور وطوارئ النساء والولادة.
التوتر سشن: مثل البلوك
السابق الكيس راح تكون فيها مجموعة أسئلة -مب شوي- وبتتقسم على الكل. الفرق هنا إن
كل الأعضاء اللي عندهم أسئلة راح يقدمون برزنتيشن. الرهيب في هذا البلوك إن الكيس
راح تكون مطابقة للكيسات اللي تناقشونها مع الدكتور في محاضرات البروبلم سولفنق.
لذلك ما راح يجي السشن إلا وانت فاهم الكيس وملمّ بها من جميع النواحي.
اللابات: هالمرة راح يكون التركيز على
مهارات إكلينيكية وطرق فحص تحتاجها كطالب طب أو طبيب بالكم سنة الجايين. راح
تتعلمون عن طريقة تنبيب الصدر، أنبوب المعدة، قسطرة المثانة وطريقة إدخال الابر في
الوريد. بالإضافة إلى الفحص السريري للقلب (الجهاز الدوري الدموي)، الرئة (الجهاز
التنفسي)، البطن (الجهاز الهضمي). لكل مهارة لستة موجودة فيها الخطوات بالترتيب،
بتوصلكم اللستة قبل موعد اللاب بالإضافة إلى مقاطع يوتيوب تشوفها وتتعلم منها. وقت
اللاب الدكتور ما راح يشرح لكم من الالف للياء نظرًا لكونكم علمتوا نفسكم من
اليوتيوب -مهزلة ندري- فراح يصحح طريقتكم ويعلمكم النواقص فقط.
الاختبارات: ميد وفاينل
و اوسكي (تتقيمون عن المهارات اللي تعلمتوها في اللابات طول البلوك)
نصيحتي ورأيي الشخصي عن هذا البلوك:
o
كلنا ندري
من سنين إن البلوك خبط لزق وكل شي تتوقعه أو ما تتوقعه راح تلقاه فيه، لذلك جهز
نفسك لأن مافي وقت تضيعه على ما تستوعب الصدمة أو تسوي نفسك مصدوم 😂.
o
بتلقى
دكاترة أقل ما يقال بحقهم إنهم أساطير وعلى الجانب الآخر بتلقى النقيض تمامًا 🌝 فحاول تأخذ الفائدة العلمية من الكل بغض النظر عن السوء الحاصل منهم. كل معلومة
تقال من أي دكتور مهمة حتى وإن لقيت نقيضها بالكتب والمراجع -عارفين إن ما يصير بس
المخرج عاوز كده-
o
دربوا نفسكم
على طريقة حل الأسئلة من بداية البلوك لا تجمعون كل شي ليلة الاختبار. حاولوا
تغطون الثيمات لأن يمكن تنصدمون إن مع كثرة المحاضرات إلا إن في نقاط ما راح تكون
مذكورة فيها. في مواضيع بيقولون لكم انها مهمة ولازم تذاكرونها وياليت تسمعون
الكلام.
o
الرسبونس
سشن والبروبلم سولفنق من أهم الأشياء اللي بتصير في هذا البلوك يفضل انكم ما
تفوتون ولا كلمة تنقال فيهم. احرصوا انكم تحضرون وتسألون وتناقشون والأفضل إنكم
تشاركون النقاط المهمة فيهم مع باقي زملائكم بالدفعة.
o
حدد طريقة
مذاكرتك من البداية بالإضافة إلى المصادر اللي بتعتمد عليها لأن مرجع جديد كل
يومين ما راح يعلمك بشكل أسرع. واللي ما يحبون الكتب هالمرة أعطوا كتاب الجراحة
فرصة، رهيب ومختصر ويرتب المعلومات بشكل جيد.
o
لا تنسون نصيبكم
من الوناسة وانبسطوا بكل لحظة، لأن مهما حصل يبقى أرهب بلوك بالسنة -وجهة نظر
تحتمل كونها خاطئة-.
بلوك 3.3 (دورة الحياة 1): ثاني
أرهب بلوك يمر عليكم هالسنة من وجهة نظري. مواضيع بداية البلوك راح تكون عن
البلوغ، الدورة الشهرية والاضطرابات اللي ممكن تحصل فيهم. بعدها تنتقلون إلى
مواضيع تخص تنظيم الانجاب والعقم والجوانب الطبية والأخلاقية لكل منهم.
في النصف الثاني من البلوك راح يكون التركيز على الحمل والتغيرات
الطبيعية فيه والاضطرابات اللي ممكن تؤثر عليه. الفحوصات ونمو الجنين والأمراض
المتعلقة فيه، الولادة وتعقيداتها المحتملة وطريقة علاجهم، انتهاءً بحديثي الولادة
وبعض الحالات المتعلقة فيهم.
التوتر سشن: الكيسات
بتكون حالات لها علاقة بمحاضرات الأسبوع نفسه. الأسئلة لكل كيس بتكون مقسمه على
بعض الطلاب (نفس النظام القديم راح يكون 2 إلى 4 برزنتر لكل كيس).
اللابات: لاب أناتومي عن الحوض
والأعضاء التناسلية. ولاب فارما عن أدوية منع الحمل (راح تتقسمون قروبات، كل قروب
عنده كيس مختلفة عن الاخر ويكتب لها خطة علاجية)
Communication skills: هالسنة
راح تتدربون على كونسلتيشن كاملة (بدون خطة علاجية). بدايةً من دخول المريض
بالعيادة إلى مناقشة التشخيص -كله تمثيل طبعًا-.
الاختبارات: ميد وفاينل
وأورال. الأورال هالمرة مختلف شوي لأن راح توصلكم لستة فيها 6 مواضيع تقريبًا
(ممكن يختلف العدد). كل موضوع يندرج تحته multiple differential
diagnoses. المطلوب منك تتعلم كيف تأخذ تاريخ مرضي حسب
شكوى المريض الأساسية وتوصل إلى التشخيص النهائي منها.
نصيحتي ورأيي الشخصي عن هذا البلوك:
o
البلوك كله
عن أشياء جديدة وأساسيات مهمة لتخصص النساء والولادة تحتاجونها السنوات الجاية لما
تقابلون مرضى حقيقيين. لذلك عشان تحبون التخصص وتتعلمون مواضيعه بأفضل طريقة ممكنة
تابعوا د. نادين شريف على اليوتيوب (قناتها باسم Dr.Nadine
Alaa Sherif). قامة من قامات التخصص وشرحها لا يعلى عليه
وأحيانًا تلقى عندها معلومات تنافس فيها مرجع المحاضرات هالبلوك.
o
وبما إننا
تكلمنا عن المرجع: الدكاترة يحبون كتاب Beckmann
جدًا ويطالبونكم فيه أكثر من المحاضرات نفسها لذلك ذاكروا منه أول بأول عشان ما
تنصدمون بالاختبارات. الكتاب يعتبر بسيط ومختصر فالمذاكرة منه بتكون أسهل من غيره.
o
بعيدًا عن
الاختبارات أو الدرجات، البلوك ممتع ومحتواه لطيف -بالنسبة لي- و لو حطيتوا لنفسكم
خطة واضحة من البداية ما بتحسون بثقله الموصوف من سنين.
بلوك 3.4 (دورة الحياة 2): البلوك
هذا أغلب محاضراته متعلقة بالأطفال مع شوية مواضيع عن أخلاقيات المهنة والشيخوخة.
ترتيب المواضيع شوي لكم عليه لكن زبدة البلوك هي إنك راح تتعلم عن نمو الأطفال
الطبيعي بالإضافة الى الاعتلالات المصاحبة في كل مرحلة عمرية. كل اللي درستوه في
بلوكات الميدسن للمرضى البالغين (2.3 و 2.4) راح تتعلمونه من جديد عند الأطفال.
أمراض الغدد، القلب، الباطنة، الجهاز التنفسي، بالإضافة إلى بعض المتلازمات
الوراثية والاضطرابات السلوكية.
بعد ما تخلصون من الأطفال راح تكملون على أمراض الشيخوخة وسن اليأس
والتغيرات المصاحبة لها، الجوانب القانونية للمواضيع المتعلقة بموت المريض
والجنازات والتبرع بالاعضاء وما إلى ذلك.
التوتر سشن: مثل نظام
البلوك السابق لكن عدد السشنز في البلوك أقل.
اللابات: اللاب الأول مطلوب منكم
تشخصون اعتلالات النمو بالاعتماد على سيناريو قصير و growth
chart. لكن قبلها طبعًا راح توصلكم الملفات اللي
تحضرون منها بالإضافة لشرح الدكاترة قبل لا تبدؤون في الحل. وبيكون فيه لاب ثاني
عن الـchild abuse محتواه مشابه للي بتاخذونه في المحاضرة.
البروبلم سولفنق: الوقت بيكون
ساعتين (ساعة لعروض الطلاب وساعة يشرح فيها الدكتور). راح يقسمون دفعتكم قروبات صغيرة
وقبل كل بروبلم سولفنق بيوصلكم ملف فيه أسئلة (غالبًا عدد الأسئلة يكون بحدود 8).
كل قروب بيكون مسؤول عن learning objective يجهز له
برزنتيشن ويشرحه. في كل مرة تقريباً 4 قروبات بنات و 4 قروبات أولاد يشرحون وبعدهم
بيشرح الدكتور محاضرة أو كيس على نفس الموضوع. طريقة التقييم لدفعتنا كانت كويز
قصير نختبره في اليوم التالي (يمكن تختلف لوقتكم خصوصًا مع احتمال عودة الدوام
الحضوري).
الاختبارات: ميد وفاينل و
أوسكي. هالمرة الاوسكي بيكون متعلق بمواضيع الأطفال اللي درستوها من بداية البلوك.
طريقة الاختبار: راح تعرض لكم 15 سلايد، كل وحده فيها سيناريو قصير مع صورة (أو
أكثر) و3 أسئلة. لدفعتنا كانت الأسئلة MCQs مع العلم
إنها كانت مقالية للدفعات السابقة.
نصيحتي ورأيي الشخصي عن هذا البلوك:
o
البلوك ثقيل
ويحتاج مذاكرة أول بأول، المواضيع متشعبة ومتشابهة لذلك المذاكرة بتركيز هي الحل
الوحيد عشان تفرق بينهم.
o
كتاب Nelson
هو
المرجع الأساسي للبلوك ولكن للأسف إنه مو أحسن كتاب بالعالم يعني. لذلك هوّن على
نفسك لو فتحت الكتاب وما فهمت منه بشكل كويس أو ما لقيت المعلومة اللي تدورها بشكل
واضح. على الاغلب المحاضرات بتكون واضحة وشرح الدكاترة جيد. في حال حسيتوا انكم
تحتاجون مرجع مختصر ف كتاب Toronto notes خيار
ممتاز للمراجعة وتثبيت المعلومات. أما لشرح المواضيع بشكل عام ف موقع MedED
يعتبر جيد في حال ما لقيتوا كل المواضيع عند Osmosis
نصيحة النهاية:
o
هالسنة
تعتبر فرصة جديدة تتعرف فيها على نفسك وقدراتك وحدودك في الوقت نفسه. لا تحرم نفسك
من أي تجربة تعرض عليك وأعطِ نفسك فرصة تجرب الأشياء اللي استبعدتها بدون ما
تجربها.
o
حافظوا على
علاقاتكم الكويسة مع الزملاء بالدفعة، قد تكون هذي فرصتك الأخيرة للدراسة مع بعضهم
فلا تبخل عليهم بذكرى طيبة أو كلمة حلوة أو مساعدة بسيطة تقدمها لأحد منهم.
o
اهتموا
بصحتكم النفسية والجسدية على حد سواء. مهما كانت الضغوط اللي حولكم تعلموا تحطون
حد لنفسكم توصلون عنده وترتاحون.
o
تنظيم الوقت
هو الفارق الوحيد في هذه السنة لأن الضغط مش بنوع المحتوى إنما بكميته. اعرف
أولوياتك و وازن بينها وكل أمورك تمشي.
o
اجتهد ولا
تتخاذل عشان ما تلقى على نفسك ملامة، في الوقت نفسه لا تقسو على نفسك لو النتائج
ما أرضت توقعاتك. وتذكر دائمًا أنك مطالب بالسعي، وعلى الله النتيجة والعوض. لذلك
لا تحمل نفسك أعباء إضافية لأمور تغييرها بيد الله وحده.
في حال انتهيتم من قراءة التجربة ولا زالت لديكم بعض الأسئلة،
قلوبنا وأبوابنا مفتوحة للجميع.
قدامكم الخير يا دكاترة، موفقين 💙
تعليقات
إرسال تعليق