السنة الأولى: طب عام و جراحة - جامعة الملك فيصل

إنهائك للسنة التحضيرية يعني التحاقك بالركب و دخولك رسميّاً في مرحلة "طبيب تحت الانشاء". مُباركٌ لك.

بالبداية:

- نظام الدراسة في كلية الطب ماشي بنظام الأرباع أو زي ما نسميها بلوكات. السنة الأولى تحتوي على أربع بلوكات كل منهم له 6 ساعات بالمعدل. و الدرجات فيه تكون مقسمة على الاختبارات (ميد و فاينل ، أورال ، براكتكل) ، اللابات و الاسايمنتات ، السشنات.

- كل بلوك راح تكون فيه محاضرات للمواد الأساسية مشابهة للتحضيري و إنما بتوسع أكثر. بالإضافة إلى بعض المحاضرات في علم الأمراض (باثولوجي) و علم الأدوية (فارما). الفرق الوحيد عن التحضيري إن في كل بلوك المحاضرات راح تتمحور على تخصص\موضوع واحد أو أكثر لكنهم متعلقين ببعض (مثلاً علم المناعة ، السرطانات و الوراثة و غيره من المواضيع).

- في هذه السنة راح يكون عندكم مادتين جدد غير البلوكات و هم التنمية المهنية (Professional development 1) و اختبار التطور المعرفي (Progress test). الأولى لها 5 ساعات بالمعدل و الثانية 3 ساعات و راح نتكلم عنها بالتفصيل.

- النقطة الأهم هي إن معدل التحضيري راح يتصفر ، و تبدأ سنتك بمعدل جديد و هذي من أفضل الفرض اللي نحصلها كطلاب جامعيين.

ايش الأشياء الجديدة اللي ممكن تواجهها في سنة أولى؟

التنمية المهنية (Professional development 1): أو زي ما نسميها بالمختصر (PD). المادة هذي عبارة عن محاضرات خفيفة و سشنات تناقشون فيها مواضيع تتعلق بأخلاقيات المهنة. عشان تتعلم كيف تتعامل مع الناس بشكل مهني و احترافي على أساس إنك طبيب. البي دي شامل أكثر من شغلة راح نتكلم عنها بالتفصيل.

اختبار التطور المعرفي (Progress test): تختبره أربع مرات بالسنة ، مرة في كل بلوك. الهدف منه هو قياس كمية المعلومات اللي حصلت عليها بالفترة اللي قضيتها بدراستك. تفاصيل الاختبار و متطلبات النجاح فيه راح نتكلم عنها بالتفصيل برضو.

Patient lecture: راح يجيكم فيها مريض (تمثيل طبعاً مو حقيقة) و يفترض منكم تاخذون تاريخه المرضي و تعبون النموذج حق التقرير بالمعلومات بمساعدة الدكتور و توصلون لتشخيصه اللي راح يكون متعلق إما بمحاضرات الأسبوع أو بموضوع التوتر سشن. التقرير راح تقدمونه في التوتر سشن و راح تتقيمون عليه برضو.

Labs: معامل تطبقون فيها بعض اللي تعلمتوه و أحياناً راح تدرسون فيها أشياء بسيطة جديدة أو معلومات مرتبطة بمواضيع المحاضرات. المعامل راح تكون متنوعة بين (أناتومي و هستولوجي و فسيولوجي و مايكرو و فارما) و راح تكون متعلقة بمواضيع البلوك. نهاية البلوك راح يكون فيه اختبار عملي لبعض المهارات اللي تعلمتوها في هذي المعامل.

Themes: هي المواضيع اللي راح تدرسونها بكل بلوك. كل ثيم فيه مجموعة من الـ Learning objectives أو ما تسمى بأهداف التعلم. هذي الأهداف راح تكون مقسمة على محاضرة أو أكثر. وهي الأشياء اللي بتكونون مطالبين بمعرفتها و دراستها و الاختبار فيها.

Manuals: مجموعة ملازم راح تنزل لكم بمكتبة أو تنرسل لكم من منسق البلوك نفسه. فيها كل الثيمات ، أسايمنتات اللابات ، الـcases الخاصة بالتوتر سشن. و أحياناً تلقون فيها لستة الكتب المطلوبة للبلوك ، تقسيم الدرجات ، و نبذة عن البلوك و طريقة تنظيمه. عدد الملازم و محتوياتها يختلف من بلوك للثاني

مواضيع البلوكات (مُختصر):

Block 1.1 (Fundamentals of medicine): راح تبدؤون تغطون بعض مواضيع البيسك اللي ما درستوها في التحضيري و أحياناً تنعاد أشياء درستوها من قبل إنما بزيادة معلومة أو معلومتين جدد. بالاضاقة إلى إنكم راح تدرسون علم الامراض و تتعرفون على الأساسيات الخلوية لـ (كيف يصير المرض داخل الجسم؟ كيف تموت الخلية؟ كيف يصير الالتهاب؟) و  راح تدرسون علم الأدوية و تتعرفون على أقسامه (و بتدرسونها قسم قسم من هنا لما نهاية السنة J). برضو راح تلقون مواضيح خفيفة و لطيفة مثل الهستولوجي اللي راح تدرسون فيه نسيج العظم و البشرة ، و الاناتومي لبعض أجزاء الجسم مثل القولون و الثدي و غيرهم من المواضيع السهلة حقت الفسيولوجي. راح تكملون على أساسيات البايوكيمستري و الجينتكس اللي بالتحضيري و تتعلمون أساسيات وراثة الجينات المرضية وبعدها تتعلمون عن الطفرات الجينية اللي تسبب أمراض و أهمها السرطان. و راح تدرسون جزء مب بسيط عن أساسيات السرطان من ناحية الباثولوجي و الجينات (عن نفسي هذا اللي دخلني بجو الطب صح). اللابات في هالبلوك بتكون مقسمة ما بين أناتومي ، هستولوجي ، بايوكيمستري و جينتكس ، باثولوجي. و راح يكون في اختبار لهم نهاية البلوك. التوتر سشن بنفس تنظيم سشنات التحضيري لكن هالمرة بتشتغلون على أمراض صدق + بتقدمون البيشنت ريبورت اللي كتبتوه في البيشنت لكتشر. المواضيع في هالبلوك متنوعة و كثيرة لكنها بتأسسكم صح.

Block 1.2 (Infection and immunity): البلوك هذا يتكلم بشكل "مركز و مكثف" عن المايكروبايولوجي (علم الاحياء الدقيقة) و الاميونتي (علم المناعة). راح تدرسون مقدمة عن كل من العلمين بعدها راح تتعرفون على البكتيريا ، الفيروسات ، الطفيليات و الفطريات. بتدرسون عن خصائصهم و أنواعهم و أشهر الأمراض اللي يسببونها و طريقة علاجها. برضو راح تدرسون عن المناعة العامة و الخاصة وتفاصيل كل واحد منها و كيف تشتغل. نهاية البلوك راح تدرسون شوية اناتومي وهستولوجي و فسيولوجي تبع الجهاز الهضمي + شوي أمراض جلدية. اللابات في هالبلوك راح تكون مايكرو ، أناتومي ، هستولوجي ، و فارما (راح تحسون انهم كثير لكنهم ممتعين بشكل و يكسرون روتين المحاضرات). و السشنات طريقتها ما بتختلف عن قبل.

Block 1.3 (Circulation and respiration): البلوك المفضل لأغلب طلاب الكلية (و أنا معهم بعد) من ناحية المواضيع و الـactivities اللي تصير فيه غير المحاضرات و الأشياء المعتادة. في دراستكم للبلوك هذا راح تركزون على ثلاث أشياء بالجسم: التنفس ، الدورة الدموية ، الكلى. راح تدرسونهم من جميع النواحي: أناتومي و هستولوجي و فسيولوجي ، وراح تتعرفون على تفاصيلهم بشكل دقيق و ممتع بشكل أكبر مما تتصورون. اللابات راح تكون متنوعة بين الاناتومي و الفسيولوجي (مع هستولوجي كالعادة). السشنات تنظيمها مثل قبل لكن الفرق الوحيد هو إن هالمرة الحالات راح تجيكم بدون عناوين لأن يفترض منكم توصلون للتشخيص بعدها تشتغلون على العنوان اللي وصلتوا له. في شي جديد هالبلوك اسمه tutorial و هو ما رح يكون أكثر من محاضرة تفاعلية بينكم و بين الدكاترة. راح يجونكم دكاترة البيسك + دكاترة متخصصين بكل تتوريال وراح تتناقشون معهم عن بعض الحالات المرضية اللي تتعلق بالاشياء اللي درستوها بمحاضرات الأسبوع.

Block 1.4 (Mind and motion): البلوك هذا راح يعجب المهتمين بعلم النفس و أتوقع إنه يكون بلوكهم المفضل. هالبلوك يتكلم بشكل أساسي عن علم النفس و النظريات القديمة و الجديدة اللي تدور حول عقل الانسان وعلاقته مع جسده ، و أفكاره و تصرفاته و كيف تأثر فيه الاحداث والمجتمعات. بالإضافة إلى بعض مواضيع الاناتومي مثل الأطراف العلوية والسفلية، و الفسيولوجي مثل الغدد وعملها. اللابات راح تكون مقسومة بين الاناتومي و الهستولوجي. السشنات هالمرة بتكون مختلفة لأنها بدون برزنتيشنات ، لكن راح يكون عندكم حالات و مواضيع تناقشونها بكل سشن و برضو راح تطلب منكم كتابة أسايمنتات و تسليمها للتوترز وكل التفاصيل راح تكون موجودة بالمانوال. برضو في سشنات جديدة غير الـPBL  ، اللي هم تبع الـ communication skills. هنا راح تتعلمون و تطورون مهارات التواصل مع المرضى بحيث تتعاملون معهم بشكل صحيح و كويس من أول ما يدخلون العيادة إلى ما تقترحون الفحوصات اللي بتساعدكم على التشخيص. التركيز في هذي السشنات بيكون على مهارات التواصل أكثر من التركيز على المخزون العلمي. برضو راح تتعلمون عن دعم الحياة الأساسي أو اللي نسميه basic life support و تتعلمون كيف تسوون الإنعاش ، كيف تسعفون الشخص المختنق ، وراح تطبقون هالمهارات و تختبرون فيها اختبار عملي بسيط.

معلومات أكثر عن كل بلوك (تنظيم البلوك ، تفاصيل اللابات والاسايمنتات ، السشنات و الاختبارات):

Block 1.1

البلوك هذا مع كثرة المواضيع و تنوعها فيه إلا إن تنظيمه كان مريح جداّ و كل شي مطلوب منا كان واضح و الكوردنيتر الرهيب طبعاً د. بهجت. بداية الباثولوجي مع د. كرشنا كانت كويسة مرة و شرحه حلو للأمانة لكنه يحتاج تركيز لأن محاضراته مترابطة ببعضها بالإضافة إلى انكم تدرسون هالاشياء لأول مرة فلازم تأسسون نفسكم صح معه و ما يمنع تقرون السلايدات قبل المحاضرة أو على الأقل تعرفون محاضرتكم بتتكلم عن ايش. أما الفارما ف ما يحتاج تشيلون همه لأن د. شيرين أسطورة ، استفيدوا منها قد ما تقدرون من أول دقيقة للنهاية.

لابات البلوك:

هستولوجي: بداية اللاب راح تنشرح لكم سلايدات تتعلق بالموضوع نفسه و أحياناً راح تكون في شرايح مجهرية متوفرة يمديكم تشوفونها "على أرض الواقع". لكل لاب راح يكون عندكم أسايمنت (تلقونه بالمانول لما تاخدونه) مكون من مجموعة أسئلة مقالية و أسئلة تحتاج رسم. الأسئلة المقالية اجاباتها موجودة بكتاب جانكويرا أما أسئلة الرسم ف راح تحلونها ف اللاب و راح يرسم معكم د. حبيب (بالنسبة للأولاد) و د. أسماء (بالنسبة للبنات). يفضل إنكم تقرون الجابتر المتعلق باللاب من جانكويرا و تحلون الأسئلة المقالية من قبل اختصار للوقت لأن تسليم الاسايمنت راح يكون بنهاية وقت اللاب (اللي هو ساعتين فقط).

الأناتومي: راح تنرسل لكم اسايمنتات لكل لاب + ورقة فيها كل الأشياء اللي مفروض تتعلمونها بهذا اللاب. الحل تلقونه إما من البرزنتيشن الخاص باللاب ، أو كتاب أطلس الاناتومي ، و أحياناً تلقونهم مع شرح الدكاترة بوقت اللاب. الأسئلة بسيطة عن مسميات أو وظائف ما راح تحتاج كتابة كثير. وتسليم الاسايمنت برضو راح يكون بنهاية وقت اللاب.

الجينتكس: كان لاب واحد درسنا فيه عن الأشياء المتعلقة بالمحاضرات ، كيف تصير وراثة بعض الامراض و انتقال بعض الصفات. للأمانة الاسايمنت كان طويل و اجاباته كثيرة لكن الحل موجود بالكتاب ف اختصار للوقت حلوه من قبل عشان تركزون بالشرح لأن اللاب ساعتين فقط ف الأفضل انكم تستفيدون بدل ما يضيع على الكتابة.

البايوكمستري: متعلق بالتنفس الخلوي و كيف تتحلل الجزيئات و وش تعطيني وكيف الجسم يستفيد منها. اللاب كان مع د. مسعد ف يفضل انكم تحاولون تفهمون معه و تخلون الحل جاهز من قبل (مع إنه بيحل معكم بس ما يمنع يعني).

الباثولوجي: راح يكون اللاب كأنه مراجعة للاشياء اللي مرت عليكم بالمحاضرات مع دكتور كرشنا و الاسايمنتات سهلة و اجابتها قصيرة وغالباً تنقال مع الشرح. من أخف و ألطف اللابات بالنسبة لي في هالبلوك.

فارما: راح تتعلمون فيهم عن هشاشة العظام بعدها راح تعلمكم د. شيرين كيف تكتبون خطة علاجية لمريض و كيف تختارون أفضل دواء مناسب حسب المرض و تفاصيل حالة المريض.

التوتر سشن:

السشن الأول (سشن المناقشة) راح يكون بعد ما تاخذون البيشنت لكتشر ، ليه؟ عشان بداية السشن هذا الطالب اللي بيكون مسؤول عن البيشنت ريبورت راح يقدمه و بعدها راح تبدون الاكتفتيز العادية من نقاش و غيره. راح يكون عندكم بكل أسبوع حالتين مرضيتين تناقشونهم و تقدمون عليهم البرزنتيشن بالسشن اللي راح يصير بنهاية الأسبوع.

الاختبارات:

الميد و الفاينل: راح تكون بالشكل المعتاد (اختياري) و الأسئلة راح تكون مقسومة أوبن و كلوز. بالأوبن يفضل إنكم تجهزون كتبكم و تحطون لكم فواصل على الـchapters المتعلقة بالمحاضرات و تلقون عليها نظرة عالسريع. أبداً مو حلو إن علاقتكم مع الكتب تكون يوم الاختبار بس. حاولوا تقرون منها من قبل ، يعني من وقت المذاكرة حتى لو شوي (مو لازم تاكلون الكتب أكل لكن ع الأقل عشان تعرفون فين ممكن تلقون المعلومة اللي تبونها).

الاختبارات العملية: هالبلوك كانوا 2. واحد للهستولوجي و الثاني شامل كل اللابات الثانية ما عدا الاناتومي. قبل كل اختبار كان في لاب مراجعة مع الدكاترة يوضحون لكم شنو المطلوب منكم و طريقة الاختبار. بشكل عام الاختبار مقالي و الأسئلة غالباً تكون اجابتها قصيرة جداً جداً. راح يكون الاختبار مقسم على أجزاء كل جزء يسمى station فيها صورة أو شريحة مجهرية تتعلق بواحد من اللابات و بعدها كم سؤال مرتبطين فيها (غالباً عدد الأسئلة يتراوح بين 2 إلى 4 ، و العلم الأكيد تاخذونه من الدكاترة). لكل ستيشن راح يكون في وقت محدد بالدقايق لو انتهى ما تقدرون ترجعون لها. التحضير للاختبار يكون من الاسايمنتات و المراجعات اللي يسوونها الدكاترة و المواضيع اللي بيحددونها لكم و احتمال يكون فيه برزنتيشن للمراجعة او برزنتيشن اللاب نفسه.

اختبار الأورال: بيكون نهاية البلوك بعد الفاينل بيومين تقريباً. الاختبار راح يكون على جزئين (بيشنت ريبورت ، كيس برزنتيشن). لما تاخذون الورق الصباح راح يكون فيها شغلتين: الفيديو اللي بتشوفونه عشان تكتبون الريبورت + اسم الدكتور/ الدكتورة اللي بتقيمكم عليه ، الاوبجكتف اللي بتسوون عليها برزنتيشن + الدكتوراللي بتعرضون عندهم. الدفعة كلها راح تكون مقسومة على 2 فيديوز ، كل فيديو راح تشوفون فيه مقابلة دكتور مع مريض و اللي عليكم انكم تكتبون المعلومات بالفورم اللي بيعطونكم إياه. أما الكيس برزنتيشن ف بيكون عندكم اوبجكتف جاهز وانتو بتسوون برزنتيشن. و راح تجيون معكم USB عشان تسلمون فيها البرزنتيشن بعد ما ينتهي وقت التجهيز. بعدين كل طالب لما يجي دوره يطلع من قاعة الانتظار و يروح يتقيم و يخلص.

Block 1.2

البلوك هذا أتعب و أنا أقول منظم ، ترتيبه رهيب جداً جداً جداً و منطقي. تدرج المواضيع فيه يساعدكم على الفهم و ترتيب خطة المذاكرة. صحيح إن الدوام أيام بيكون طويل و تحسون إنه متعب لكن إذا شديتوا حيلكم من البداية وحاولتوا تفهمون مع الدكاترة أول بأول كل شي بيمشي زي الفل. راح يبدأ البلوك بمقدمات و أساسيات عن المايكرو و المناعة بعدها بتتدرجون بالمواضيع الباقي ، ونهاية البلوك شوي اناتومي وفسيولوجي وجلدية. للأمانة قد ما تشدون حيلكم الدكاترة راح يساعدونكم. صح تحتاجون حفظ كثير (و اللي أغلبنا ما يحبه) و راح تمر عليكم أسماء غريبة لبكتيريا و فايروسات و أدوية (وكائنات غريبة و أشياء أخرى J) ، ما تحتاجون إلا إنكم تذاكرون بالهداوة و ما تضغطون نفسكم بوقت قصير ، الراحة أهم شي. هالبلوك يمكن يحسن علاقتكم بالكتب والمذاكرة منها بسبب كتاب الاميون. كتاب صغير خفيف لطيف و شرحه واضح و يفهم مرة وبتدرسون كل المواضيع اللي فيه. مرتب و مش معقد و ما يضيع ، بتكون فترة صلح لكل اللي ما يحبون يذاكرون من الكتب. بشكل عام مذاكرة الاميون ممتعة مره و لما تتأسس فيها صح من البداية راح ترتاح بعدين.

لابات البلوك:

مايكرو: من أونس اللابات اللي بتمر عليكم هالسنة لأنكم راح تشتغلون بيدكم مو بس تطالعون. من أول لاب راح تجهوزن عينات بكتيريا وتشتغلون عليها باللابات اللي بعدها. كل لاب بتطبقون شي جديد يتعلق بالمواضيع اللي درستوها بالمحاضرات. في كل لاب راح يكون جزء منه يشرحون فيه الدكاترة و جزء تشتغلون و تحلون الاسايمنت اللي بتسلمونه نهاية اللاب. الاسايمنت ممكن تكون فيه أسئلة مقالية يمديكم تلقون اجاباتها و تحلونها من قبل ، و ممكن تكون فيه أسئلة تعتمد على عينتكم اللي تشتغلون عليها. بشكل عام هاللاب كان موعد كسر الروتين الأسبوعي في البلوك و تجربة جديدة استفيدوا منها.

اميون: راح يكون لاب واحد بتدرسون فيه عن أنواع اللقاحات (أو زي ما نسميها التطعيمات) بتكون عندكم حالات مرضية تناقشونها وقت اللاب تتعلق بهالموضوع بالإضافة إلى حل الأسايمنت.

باثولوجي: لاب واحد يشبه لطريقة البلوك الماضي لكن هالمرة بتتكلمون عن الالتهابات بشكل خاص. والاسايمنت قصير و سهل وينحل بدقايق

هستولوجي: نفس الطريقة المعتادة مع فرق المواضيع ، راح تكملون أنواع الانسجة اللي ما كملناها بالبلوك الأول.

فارما: راح تطبقون فيها بعض التقنيات والقياسات والحسابات اللي درستوها بالمحاضرات. اللاب خفيف و سهل وشرح دكتورة شيرين رهيب مرة و يثبت اللي اخذتوه بالمحاضرة. الاسايمنت كان رسم بياني و سهل مره تسوونه باللاب وتسلمونه بعد ما تخلصون.

أناتومي: بنفس طريقة اللابات اللي قبل ، المواضيع هالمرة بتكون متعلقة بمنطقة البطن و أعضاء الجهاز الهضمي.

التوتر سشن:

بنفس طريقة البلوك اللي فات. الفرق الوحيد بنوعية الامراض اللي راح تتكلمون عنها ، راح تكون أمراض بكتيرية و فيروسية أو غيرها. بعضها بيكون مر عليكم كمثال في أحد المحاضرات و أحياناً راح تتعلمون عن أشياء جديدة. راح يكون السشن تعزيز قوي جداً للمحاضرات و بتستفيدون من مذاكرتكم لمعلومات البيسك بالمحاضرات (اللي أحيانا تكون مملة) لما تشوفون وش يصير بهالامراض.

الاختبارات:

الميد و الفاينل: راح تكون بالشكل المعتاد مثلها مثل البلوك الأول. حاولوا ما توترون نفسكم لما تشوفون عدد الكتب بالاختبار كثير لأن سواء كان كتاب واحد أو عشرة كتب راح تطلعون الإجابة ما يحتاج تشيلون هم. و النصيحة اللي بكررها كل شوي: لا تخلون علاقتكم بالكتاب تبدا و تنتهي وقت الاختبار! لازم تتصالحون معهم من بدري.

الاختبارات العملية: هالبلوك كانوا 2. واحد للأناتومي و الثاني للمايكرو. الاناتومي تصير فيه مراجعة مع الدكاترة و بعدها بيوصلكم برزنتيشن فيه كل المطلوب منكم تذاكرونه. الاختبار بيكون عبارة عن عضو أو جزء تتعرفون عليه ، تكتبون اسمه ويكون فيه أسئلة بسيطة مره متعلقة فيه. أما المايكرو راح يحددون لكم المواضيع اللي داخلة معكم بالاختبار و راح تذاكرونها من الملزمة الخاصة بالاختبار بالإضافة لبعض المراجعات اللي مسوينها الطلاب ممكن تساعدكم كثير كثير. طريقة الاختبار نفسه راح يكون ستشينز و كل ستيشن لها وقت محدد و تحلون فيه. الطريقة بتكون ماشية على كل الاختبارات العملية.

Block 1.3

البلوك اللي بعده بتقول هاتوا الطب من أقصاه. بلوك رهيب و ممتع بشكل ما ينوصف. المواضيع حلوه و بتقابلون دكاتره عظيمين جداً. راح تدرسون عن الجهاز التنفسي و الجهاز الدوري الدموي و الكلى و بتدخلون بتفاصيل التفاصيل. كتاب قايتون بيكون صديقكم المقرب هالبلوك و ما يمنع اليوتيوب بعد. الشي المميز إنك بتصير تتعلم عن مواضيع تشوفها بالواقع كثير مثل الضغط و الربو و أمراض القلب و الجلطات و أمراض الكلى و الفشل الكلوي. ترتيب مواضيع البلوك كويس لكن المشكلة الوحيدة إن كل محاضرة تأسسك للي جاي بعدها. يعني لازم تمسك نفسك من البداية وتشد حيلك عشان تنبسط بالبلوك و تحبه (لأنه فعلاً ينحب!). برضو ما راح تحتاج الحفظ كثير قد ما تحتاج إنك تفهم و تشغل العقل و المنطق و تعلم تربط الأشياء الصغيرة ببعضها عشان تتكون عندك صورة كبيرة واضحة.

لابات البلوك:

فسيولوجي: أكثر شي مميز بهالبلوك. راح تتعلمون كيف تسوون اختبار وظائف الرئة ، كيف تقيسون الضغط ، كيف تسوون تخطيط القلب. اللاب ممتع بشكل و الساعتين بتمر و انتو مو حاسين فيها. الاسايمنتات سهلة و قصيرة وكلها متعلقة بنتائج الأشياء اللي راح تطبقونها في اللاب. يعني لو فاهم المحاضرات اللي تدرسها و حضرت على خفيف قبل لا تجي اللاب راح تستفيد بشكل كبير جداً.

أناتومي: بنفس طريقة اللابات اللي قبل ، لكن هالمرة بتركزون على الصدر و الأعضاء الموجودة فيه من قلب و رئة و تفاصيل غيرها.

هستولوجي: بنفس طريقة اللابات اللي قبل لكن هالمرة راح تدرسون عن الانسجة الموجودة بالجهاز الدوري الدموي.

التوتر سشن:

نفس ترتيب السشنات بالبلوكات اللي قبل الفرق هو إن الحالات هالمرة بتجيكم بدون عناوين ، راح "تفصفصون" السيناريو تبع الحالة مع التوتر حقكم و يساعدكم عشان تمشون بالطريق الصح وتجيبون التشخيص بعدها تبدؤون تناقشون. عن نفسي جزء التشخيص كان أكثر شي يحمسني بالسشنات ، راح تتعلمون كيف تفكرون بمنطق و تصيرون دقيقين ملاحظة و تربطون الأشياء ببعض. برضو الفترة بين سشن النقاش و العرض بتكون أطول و تفيد البرزنترز وقت التجهيز.

التتوريال:

محاضرة تفاعلية راح يختلف موضوعها كل مره على حسب المواضيع اللي درستوها بالاسبوعين اللي قبلها. راح يجيكم دكتور بيسك (فسيولوجي غالباً) و دكتور متخصص (تنفسية، قلب، كلى، على حسب الموضوع). راح يبدؤون بشرح بسيط للبيسك بالفسيولوجي بعدها بيصير الموضوع أقرب للمناقشة عن حالات معينة. يحتاج تحضرون نفسكم و تقرون حتى لو شوي، حسب تحضيركم وتفاعلكم راح تستفيدون. إذا عاملتوها زي باقي المحاضرات ما راح تستفيدون إلا بنسبة بسيطة تكاد لا تذكر. كونكم طلاب في السنة الأولى وتحصل لكم فرصة تتعلمون من أصحاب التخصصات الدقيقة هذا شي كويس للي يعرف يستفيد منه.

الاختبارات:

الميد و الفاينل: بنفس الطريقة المعتادة إلا إن عدد الكتب هالمرة بيكون أقل بشكل ملحوظ، يعني مالكم عذر لازم تتصالحون معهم.

الاختبارات العملية: هالبلوك بتكون اناتومي و فسيولوجي. بنفس الطريقة المعتادة لكل اختبار، و إذا ما صارت فيه مراجعات فأكيد راح تلقون نوتات و ملخصات الطلاب سواء من دفعتكم ، دفعتنا ، أو الدفعات اللي قبل.

اختبار الاورال: نفس تنظيم الاختبار في البلوك الأول. الفرق الوحيد هو بالنسبة لجزء الكيس برزنتيشن. البلوك الأول كنتوا تستلمون الاوبجكتف نفسه. هالبلوك راح تستلمون اسم المرض أو الحالة و تكون لكم حرية اختيار الاوبجكتف اللي تبونها بحيث تعرضونها ف الوقت المحدد لكم. هالطريقة بتكون أريح بإنك ما راح تحط لنفسك إلا اوبجكتف فاهمه و تقدر تشرحه و تخليك تضمن جزء كبير من درجتك.

Block 1.4

هالبلوك مثل ما قلت من قبل يحبونه الناس اللي عندها اهتمام بعلم النفس (اللي مو مهتمين لكم الله). بداية هالبلوك راح تدرسون علم النفس ولا شيء غيره. من النظريات القديمة و أول ما تأسس لما الأشياء اللي يعتمد عليها الحين. بتشوفون أسماء علماء واجد و بتدرسون نظريات قديمة مب منطقية بالنسبة للعالم (بس مشوها). بعد الميد تدخل لكم بعض محاضرات الاناتومي و شويتين فارما. الشي الكويس في هالبلوك إن الدوام قصير و المحاضرات قليلة جداّ و يمديك تلحق تذاكر أول بأول بدون ما تضغط نفسك (يعني بالعربي الفصيح يمديك تجمع درجات..)

لابات البلوك:

أناتومي: بنفس طريقة اللابات اللي قبل ، لكن هالمرة بتركزون على الأطراف العلوية والسفلية من عظام و عضلات و أعصاب و غيرها من التفاصيل. اللابات بتكون تطبيق لكل اللي تدرسونه نظري بالمحاضرات. مافي شي بيمر عليكم بمحاضرة اناتومي هالبلوك و ما تشوفونه باللاب ، استفيدوا منه زين.

التوتر سشن:

السشن هالمرة مختلف و السبب إن مافي برزنتيشن ، في نقاشات و تسليم أسايمنتات. النقاش كان عن مواضيع متعلقة بالنفس و الحياة و الأفكار و كيف تغيرونها و كانت فيه أشياء كويسة يعني. بالتفاصيل تبع كل سيشن راح تقلون مهمات تنفذونها (أي نعم صارت جومانجي مو سشنات) اما تقرون جزء محدد من الكتاب ، أو تحلون أسايمنت موجود بالمانول ، أو تكتبون أسايمنت على أساس فكرة أو سؤال معين. الاسايمنتات بتكون لتغيير عادة شخص (مثلا تخلونه يترك التدخين أو يقلل قهوة أو ياكل أكل صحي) و بتسوون جلسات استشارة و بتحطون خطة و تشيكون على "مريضكم" اذا ماشي عليها و بتقيمون النتائج.

Communication skills session:

هنا راح تحطون كل العلم اللي تعلمتوه على جنب و تتعلمون تتواصلون مع المرضى كونكم ناس طبيعية مو بس دكاترة. راح تتعلمون و تتناقشون عن المهارات المطلوبة من كل طبيب خلال تواصله مع المرضى بعدها راح تمثلون و تتقيمون على المهارات هذي و تاخذون ملاحظات سواء كان من زملائكم او من الدكتور نفسه ، الهدف من كل هذا هو إنك تتعلم كيف تتواصل صح و تعرف ايش اللي يبيه المرض منك وتعطيه.

Basic Life Support (BLS):

راح تكون محاضرة لمدة ساعتين في معامل المحاكاة، يشرحون لكم فيها عن أساسيات الإسعاف و الإنعاش القلبي الرئوي و كيف تتصرف في بعض الحالات الطارئة. بعدها بتطبقون و تختبرون ف هذي المهارات اللي تعلمتوها. انا من المجموعة اللي شرح لها و اختبرها د. ياسين و أحس انو يا حظي. فعليا كان انسان لطيف على كل المقاييس و شرحه رهيب مرة.

الاختبارات:

الميد و الفاينل: بنفس الطريقة المعتادة و عدد الكتب قليل برضو لكن كتاب السايكو يحتاج تتصالحون معه من بداية البلوك لأنه يحوس شوي

الاختبارات العملية: هالبلوك بتكون للاناتومي بس ، و راح يوصلكم برزنتيشن المراجعة فيه كل شي تذاكرون منه و الأسئلة سهلة وبسيط و بنفس الطريقة المعتادة لاختبارات العملية.

الحين نجي للشغلتين الجدد غير البلوكات: الـPD و البروقرس.

Professional development:

الكوتش قروب: راح تكون 13 اجتماع مقسمة على طول السنة ، تناقشون فيها مواضيع متعلقة بأخلاقيات المهنة ، و تجارب مريتوا فيها انتوا أو احد من أقاربكم (ميتنق للسواليف). راح تطلب منكم أسايمنتات لها علاقة بالاشياء اللي تكلمتوا عنها بالسشن و كل شي بيكون واضح و توصلكم تعليمات كل اسايمنت بالتفصيل.

الإحصاء: مقسم بين محاضرات و لابات. راح تدرسون فيه عن طريقة جمع البيانات و اختيار العينات و المقاييس اللي تفيدكم كباحثين في المجال الصحي. في اللابات برضو راح تتعلمون على برنامج SPSS عشان تتعاملون مع العينات الكبيرة مرة واللي ما تقدرون تحسبون مقاييسها يدوياً. د. سيد أحسن واحد يشرح إحصاء بالعالم حرفياً. و خفيف دم و وسيع صدر و يخليك تفهم غصب.

المنتور: راح تتعلمون فيه عن الأساسيات اللي تتكون منها الأوراق البحثية بعدها راح تتعلمون كيف تنقدونها و على أي أساس. بعدها راح تشتغلون مع الدفعة اللي اكبر منكم (يعني حنا) و تنقدون ورقة بحثية و تقيمونها على حسب نموذج محدد ينرسل لكم من المنسق.

الانترنشب: راح يقسمون الدفعة على أيام محددة و تتوزعون على العيادات (حقين مستشفى الجامعة) راح تقعدون بالعيادة مع الدكتور أو الدكتورة أربع ساعات تقريباً تشوفون فيها طريقة التواصل مع المرضى عل أرض الواقع و تتعلمون. بعدها بيكون عندكم اسايمنت تكتبونه على حسب هالتجربة. عن نفسي كانت من ألطف التجارب اللي مريت فيها هالسنة و كل شي فيها كان كويس.

قلوبل هلث: راح تتعلمون فيها عن المشاكل الصحية العالمية زي السمنة و بعض الامراض و الأوبئة بالإضافة إلى ان راح ينطلب منكم كل مره تسوون برزنتيشن يخص الموضوع اللي درستوه و تعرضونه باليوم المخصص لكم و تناقشونه مع باقي القروبات.

ايثكس: محاضرات راح تتعلمون فيها عن أخلاقيات المهنة و تناقشون بعض الحالات اللي ممكن تواجهون فيها مشاكل في اتخاذ القرار بشكل مناسب صحياً و أخلاقياً.

Progress test:

الاختبار يصير أربع مرات بكل سنة، عدد الأسئلة يتراوح بين 192 و 200 سؤال و عدد الخيارات لكل سؤال يتراوح بين 2 و 5، و المميز في هذا الاختبار انك راح تلقى بورقة الإجابة خيار (؟) و اللي معناها I DON’T KNOW. نموذج الأسئلة موحد لكل طلاب و طالبات الكلية من كل الدفعات. الهدف منه إنه يقيس المعلومات اللي جمعتها طوال الفترة اللي درست فيها بالكلية.  النجاح فيه يعتمد على متوسط درجات دفعتك كيف؟ خلونا أول شي نشوف كيف تنحسب الدرجات:

* لكل سؤال تحله صح تأخذ درجة وحدة مهما كان عدد الخيارات.

* كل سؤال تحله خطأ راح تنقص من مجموع درجاتك اللي جمعتها بالاجابات الصحيحة و النقص راح يكون مختلف حسب عدد خيارات السؤال:

درجة كاملة للسؤال اللي له خيارين ، نص درجة للسؤال اللي له ثلاث خيارات ، ثلث درجة للسؤال اللي له أربع خيارات ، و ربع درجة للسؤال اللي له خمس خيارات.

* كل سؤال تكون إجابتك فيه I don’t know ما راح يزيد درجاتك و بالمقابل ما راح ينقصها برضو.

* تحسب درجتك من 100 بـ: مجموع درجات الإجابات الصحيحة ، تطرح منها الدرجات اللي نقصتها و تقسم الناتج على عدد الأسئلة بالاختبار.

* بعدها الجامعة راح يحسبون متوسط درجات الدفعة و يكون هو حد النجاح و يسمونه الكت اوف.

* نتايج الاختبار بتكون مقسمة على ثلاث تقديرات:

Fail: اللي درجتهم أقل من الكت اوف ، Pass: اللي درجتهم تكون على الكت اوف أو أعلى منها بشوي ، Good: اللي درجتهم أعلى من الكت اوف بكثير.

الشي اللي مفروض تسويه هو إنك تحل الأسئلة اللي درستها و تعرفها ، بحيث تجمع درجاتك. لا تجازف كثير بحيث تروح تعبك و لا تكون خواف برضو وانت يمديك تجيب أعلى. حاول توازن بين الأشياء اللي تعرفها و متأكد منها ، والاشياء اللي شاك فيها بس أغلب الظن إنها تكون صح ، و الأشياء اللي بتحلها ضربة حظ و يمكن تضبط. السؤال اللي ما تعرف اجابته ولا تدري عنه اختار I don’t know. الخيار هذا موجود عشان مصلحتك.

النجاح في بروقرس سنة أولى يتطلب النجاح في اختبارين من أصل أربعة راح تختبرونهم ، أما بالنسبة لحساب grade المادة السنوي اللي بينزل في سجلاتكم الأكاديمية: موجود جدول فيه تقسيم القريد على أساس نتايجك في الاختبارات الأربعة و راح يوصلكم بإذن الله.

الحين نجي للمهم: وش وضع سنة أولى بشكل عام و وش اللي طلعت فيه بنهايتها؟

- هالسنة نقلة نوعية من كل النواحي ، علمياً وعلى المستوى الشخصي بعد. من لما تداوم أول يوم بالكلية تحط ببالك إنك لازم تبدأ صح. بدايتك ترسم لك طريق واضح يوفر عليك تعب التخبط بعدين. حاول تستفيد من كل لحظة و ما تضيعها وبنفس الوقت تستمتع فيها بتجرب أشياء جديدة عليك و ممكن تكون كثيرة لكن بالنهاية بتتعود على كل شي. لا تخلي رهبة البدايات تقتل حماسك لأي شي.

- مو عيب تسأل ، مو عيب تفشل بشي ، مو عيب إنك تقول ما أعرف .. خل فضولك هو الدافع الأول لك عشان تتعلم.

- يمكن تمر عليك أوقات صعبة تراودك فيها نفسك بفكرة الانسحاب لكن تذكر "إن الله لا يعطي أصعب المعارك إلا لأقوى جنوده". ابعد نفسك عن الناس المحبطة الياسة من كل شي و خلك بوسط الناس اللي تذكرك بكل الأشياء الصعبة اللي مرت عليك و تجاوزتها ، وبكل الأوقات اللي توقعتها ما تعدي و عدّت.

- مهما سمعت تجارب ناس أو قريتها ، خلّي لنفسك فرصة تصنع تجربتك الخاصة ، جرب شي جديد بكل مرة و لا تحط نفسك بقالب محدد. جرب لما توصل للشي اللي يقنعك و يرضيك و يحقق لك النتايج اللي تبيها.

- عن نفسي: أعتبر هالسنة غيرت بشخصيتي كثير و للأفضل. كونك تحتك بشكل أقرب لناس يشاركونك حلمك و اهتماماتك و جزء كبير من حياتك يخليك تتأثر و تتغير.

نصيحة خليها بقلبك و عقلك دايماً:

الطب مو تخصص وبس ، الطب حياة. تعلم كيف تعيش فيها عشان ما تدفن نفسك بشي واحد بينما عندك ألف شي يمديك تنبسط فيه.

قدامكم الخير يا دكاترة ، موفقين ♥.